Mayra F. y Alfredo G. La Jueya, 20/03/2021.
Guillermo Mosquera, ex alumnu del Ies Rey Pelayo y poetrastru finó’l bachilleratu de humanidades nel añu escolar 2013 – 2014.
Tras finar l’institutu, matriculóse pola Universidad d’Uviéu na carrera de Filosofía. Ahora encuéntrase faciendo una FP de Integración Social. También colabora con diferentes asociaciones como voluntariu.
¿Qué significáu tien el IES Rey Pelayo na to vida?
Como para munchos, l’institutu foi la etapa na qu’unu se da cuenta de too lo que-y falta para ser un home, muyer o lo que s’aspire a ser na vida. Aprendí’l valor d’estudiar por placer, non por obligación (anque tengo por obligación sentir placer). Namoreme por primera vegada, pero nun foi la última que me rechazaron. Y trazó el camín de siguir a nivel moral, que ye lo mesmo que dicir a nivel humanu.
¿Qu’alcordances tienes de la to etapa nel institutu?
Tengo na memoria llegar un llunes, triunfante col chándal del Cánicas, dempués de ganar al Arenas na lliga qu’a la fin acabamos per facer nuesa en 4° de la ESO. Alcordanza tamién de dir a setiembre con mieu de nun llegar vivu a ochobre si suspendía matemátiques… Alcuérdome de munches coses, menos de cómo se despejaba la X o la Y (sí, a la fin suspendí, asina supi que yera de lletres)
¿Recuerdas dalguna anécdota del tu pasu pol institutu?
Yera frecuente qu’oyer tacones polos pasiellos fora más convincente e intimidante para dir a clase qu’oyer el mesmu timbre. Tratábase de la banda sonora d’Amparo, entós xefa d’estudios y qu’entá güei querémosla con muncho cariñu, anque entós escondiéramos d’ella… Bonu, o s’escondíen los que teníen daqué que oculta-y. Yo non eh. Yo yera aplicáu.
¿Qué profesor foi’l que más te marcó como estudiante?
Más d’unu y d’una podría llevase el troféu. Pero oyer falar d’un tal Juanín el de Viboli diome muncho interés nel so día. Barrena fixo que los domingos nel mercáu de Cangues planteara entrugues de lóxica a los fruteros que portaben cestes con peres y mazanes, a ver si dalgunu de casualidá respondía al nome de Juanín y ayudábame a aprobar la tercer evaluación de filosofía.
Amás, toos los discípulos tienen na memoria siempres al primer maestru.
¿Cuándo decidisti la carrera que dibas facer?
A la fin de segundu de bachiller, pero escoyóme ella a mi, yo limiteme a nun oponer resistencia y dexame llevar. Cuando vi que filosofía yera l’únicu 10 que tenía na selectividá supi que nun me quedaba otra. Había que demostrar que yera bonu en daqué, anque nun fuera daqué bonu.
Tamién que cuando lleí a un tal Descartes y fíxome duldar de lo poco que yá sabía entós, picóme l’interés pola asignatura.
¿Qué conseyu nos das a los futuros universitarios?
Que penséis en trés preguntes antes d’escoyer carrera: ¿Qué me gusta? ¿Qué se me da bien? ¿Qué quiero ser?
Si les trés preguntes llévenvos a una mesma respuesta, norabona, ye esa la carrera. Pero si son varies les opciones, fijaos na primera entruga, porque táis n’edá d’aprender lo que vos gusta. Pa preocupavos por trabayar y les salíes yá vais tener tola vida, tengáis carrera o non.
¿Cuándo entamasti a escribir poesía?
Nun puede llamase poesía a lo que faigo, sería un agraviu para esi arte considerame poeta.
Yo soi poetastru, y faigo parresía, como bon cínicu. De toes formes, entamé a rimar en 2° de la ESO. Lleí a Miguel Hernández, Dámaso Alonso y Rubén Darío diendo nel bus a clase y supi qu’eso yera poesía de verdá. Depués, yá en 3° de carrera, empecé a lleer poesía n’asturianu, llingua de la que soi analfabetu autodidacta y fervosu defensor de la so oficialidá. A Berta Piñán, Antón García y Xuan Bello débo-yos el mio interés pola escritura asturiana.
¿A qué te dediques actualmente?
Tras graduarme decidí descansar de la filosofía académica para dedicame a la mundana.
Pese a que el mio plan yera ser profesor de filosofía, antes precisaba cambiar d’aires, y siendo que siempres quixi dedicame profesionalmente al ámbitu social probé suerte cola FP superior d’integración social, qu’agora toi a puntu de terminar.
Como complementu a la esperiencia, tamién soi voluntariu n’Uviéu y en Picos d’Europa n’asociaciones que promueven movimientos en favor de colectivos en riesgu d’esclusión social.
¿En qué ti prestaría vete trabayando nel futuru?
A raíz de lo anterior, tengo la duda ente ser profesor de filosofía o trabayar con persones en riesgu d’esclusión, especialmente con diversidá funcional.
Probablemente voi empezar a buscar trabayu d’esto últimu en breve, y si les coses nun salen como me gustaría, siempre puedo opositar para dar clases de lóxica nel mercáu de los domingos.